თუკი თქვენ სკოლა ან უმაღლესი სასწავლებელი ახლახანს დაამთავრეთ, ცხადია ჯერ დიდი სამუშაო გამოცდილება არ გექნებათ, შესაბამისად რეზიუმეც საკმაოდ მოკლე (ღარიბი) გამოვა. როგორ უნდა მოვხიბლოთ დამსაქმებელი ასეთ შემთხვევაში?
სტაჟირება – ჩათვალეთ, რომ სამუშაო ნახევრად უკვე იპოვეთ.
თუ თქვენ არ გაქვთ მუშაობის დიდი გამოცდილება, მაშინ განსაკუთრებით მნიშვნელოვანია სტაჟირება.
კანდიდატების შერჩევისას დამსაქმებლები დიდ მნიშვნელობას ანიჭებენ განათლებასა და პროფესიულ უნარებს, თუმცა არანაკლებ მნიშვნელოვანია, შეუძლია თუ არა თანამშრომელს გაუმკლავდეს კომპანიის უნიკალურ გამოწვევებს.
თუ არ გაქვთ გამოცდილება ან არ გაქვთ თქვენი კვალიფიკაციის დამადასტურებელი სერტიფიკატები, შეეცადეთ პრაქტიკაში აჩვენოთ თქვენი უნარები და თქვენს რეზიუმესთან ერთად წარადგინოთ კონკრეტული ორგანიზაციისთვის სპეციალურად შემუშავებული დასრულებული პროექტი. მაგალითად, თუ დიზაინის სამუშაოზე განაცხადს აკეთებთ, შეიმუშავეთ ორგანიზაციისთვის ახალი ბანერები და წარუდგინეთ ისინი დამსაქმებელს, ახსენით, თუ რატომ დაეხმარება ისინი მეტი მომხმარებლის მოზიდვას.
ეს აჩვენებს თქვენს ექსპერტიზას და თქვენი მომავალი მენეჯერი შეძლებს შეაფასოს თქვენი შესაფერისობა კომპანიისთვის. აქ მოცემულია ეტაპობრივი ინსტრუქცია, თუ როგორ შეარჩიოთ ვაკანსიები და მოამზადოთ მათთვის პროექტი.
ნაბიჯი 1. განსაზღვრეთ რამდენიმე ვაკანსია, რომლისთვისაც შეიმუშავებთ პროექტს.
ვაკანსიების ძიებისას გირჩევთ დაიცვათ ეს სამი წესი:
- თუ ვაკანსია მოითხოვს 3 წლიან გამოცდილებას და თქვენ მხოლოდ ერთი წელი გაქვთ, თქვენ ნამდვილად გაქვთ შანსი. თუმცა, უმჯობესია თავი აარიდოთ იმ პოზიციებს, რომლებიც 7 წელს მოითხოვს.
- თუ კვალიფიკაცია არ გაქვთ, ეს ნორმალურია. თუმცა, თუ ვაკანსია მოითხოვს აკადემიურ ხარისხს, ნუ დაკარგავთ დროს.
- შეაფასეთ პასუხისმგებლობები და დარწმუნდით, რომ შეგიძლიათ სამუშაოს კარგად შესრულება. შეიძლება არ გქონდეთ საჭირო სერტიფიკატები, მაგრამ უნდა გქონდეთ პროფესიული კომპეტენციები.
ნაბიჯი 2. გააანალიზეთ ვაკანსიაში მოცემული დავალებები, რომლებსაც შეასრულებთ.
თქვენ უნდა გესმოდეთ, რა სამუშაოს შეასრულებთ თქვენს ახალ პოზიციაზე. შემდეგ, განსაზღვრეთ, რომელი პასუხისმგებლობები არ მოითხოვს ორგანიზაციის შიდა პროცესების ცოდნას და დაიწყეთ მათთვის პროექტის შემუშავება.
ნაბიჯი 3. მოამზადეთ პროექტი თითოეული ორგანიზაციისთვის.
მაგალითად, თუ თქვენ პროდუქტის განვითარების სპეციალისტის პოზიციას ისახავთ მიზნად, დამოუკიდებლად გამოსცადეთ კომპანიის ერთ-ერთი სერვისი და შეიმუშავეთ იდეები მისი გაუმჯობესების შესახებ.
ნაბიჯი 4. გაგზავნეთ თქვენი პროექტი რეზიუმესთან ერთად.
შეტყობინების ნიმუში:
გამარჯობა, (მენეჯერის/რეკრუტერის სახელი და გვარი)!
მე მქვია (თქვენი სახელი და გვარი) და გავიგე, რომ თქვენ ეძებთ სპეციალისტს, ამიტომ მინდა შემოგთავაზოთ ჩემი კანდიდატურის განხილვა. გადავწყვიტე შემექმნა პროექტი (მოკლე აღწერა), რათა წარმოვაჩინო ჩემი უნარები და ღირებულება ორგანიზაციისთვის.
(პროექტის პრეზენტაცია)
(თქვენი გამოცდილების მოკლე აღწერა 2-3 წინადადებით)
გმადლობთ ყურადღებისთვის და მოუთმენლად ველი ჩვენს შემდგომ თანამშრომლობას!